ازاي تبدأ هواية الزرع بسهولة؟

المرة دي هتكلم عن حاجة مالهاش علاقة بالبرمجة، ودي حاجة جديدة عليّا هنا. كمان قررت أكتب المقال ده بالعربي، لأني لاحظت إن بقيت بتكلم عربي مكسر وأدخل كلمات إنجليزي في وسط الكلام من غير داعي.

وزي ما دي أول مرة أكتب بالعربي، هي كمان أول مرة أتكلم عن هواية بعيد تمامًا عن شغلي... وهي الزرع 

بدأت علاقتي بالزرع بشكل جدي وقت الكورونا سنة 2020. وقت ما كانت الحياة بطيئة، والضغط عالي، والناس كلها محبوسة في البيوت، الزرع كان من أكتر الحاجات اللي خلتني أهدى وأرتّب أفكاري. ومن وقتها، الهواية دي فضلت تكبر معايا سنة ورا سنة.

ليه الزرع؟ وليه بقى جزء من حياتي؟

الزرع بالنسبالي بدأ وقت الكورونا. كنا تحت ضغط والدنيا واقفة، لكن شتلة صغيرة كانت بتكبر قدامي كل يوم، وده فرق معايا بشكل ما كنتش متوقعه. الزرع علّمني الصبر، والملاحظة، والإحساس بالتفاصيل الصغيرة. كل ورقة جديدة كانت علامة إن فيه حاجة حلوة بتحصل، وإن رغم كل اللي حوالينا، لسه في حاجة بتتنفس وبتنمو.

الزرع بيهدي الأعصاب، بيفصلك عن الزحمة، ويدي وقت لنفسك. ساعة واحدة بتسقي أو بتشيل ورق ناشف أهدى من 10 دقايق على الموبايل. بعيد عن أثره النفسي، الزرع ممتع. بتغلط وتتعلم وتشوف النتيجة بعينك، وبتكبر شغفك مع كل ورقة أو زهرة جديدة. ومش محتاج تكون خبير، كل اللي محتاجه شوية فضول وهدوء ونية إنك تدي وتتعلم.

مش كل النباتات زي بعض

فيه نباتات تحب الشمس المباشرة، وفيه اللي تموت منها. نباتات تعيش بالعطش، وأخرى تموت لو نسيتها. نبات يحب الطينة، ونبات يموت فيها. نبات محتاج دعامة، ونبات لأ. نبات يعيش سنين من غير سماد، ونبات يدبل من غيره.

ماتشتريش ٢٠ نوع وتحطهم تحت نفس الشمس وتديهم نفس المية وتتخيل إنهم هينجحوا. لو هتزرع في أصيص، متحطش نباتات باحتياجات مختلفة مع بعض، الأفضل تزرع نفس النوع. ولو بتنسى، متجبش نبات يموت من العطش بسرعة.

 تزرع فين ؟

جوا البيت: محتاج تربة بيتموس + بيرلايت عشان تصرف المية. المية ما بتتبخرش بسرعة، فمهم التصريف.
البلكونة: شمس جزئية، فاختار نباتات مش محتاجة شمس قوية.
السطح: شمس طول اليوم، فلازم نباتات تتحمل الحرارة.
الجنينة: أسهل مكان، التربة بتصرف المية والنبات بيكبر طبيعي، ومش محتاج تنقله لأصيص.

الزرع مش دايمًا بينجح

ممكن تزرع ١٠ بذور، ٧ ينبتوا، ومنهم ٤ يكملوا. ممكن موجة حر أو برد تموت الزرعة، وده طبيعي. بلاش تدخل الزراعة بعقلية "أقفل الـ١٠٠٪". الزرع بيعلم الصبر، والتقبل، والتجربة.

أشجار مثمرة جربتها

بحب الموالح (يوسفي – برتقال – ليمون – جريب فروت) وبنصح بيها جدا: بتطرح سنويًا، ريحتها حلوة وقت الازهار، وعنايتها سهلة.
الكمثرى والخوخ: عناية قليلة ومية منتظمة.
النخيل: مبيحتاجش مية كتير، ولا سماد، بس لازم يتقلم ويتطعم.

المانجا: ورقها كبير وبتحتاج رش دائم وشمس قوية.
الرمان: لازم يترش، وإلا ذبابة الفاكهة تخرب المحصول.
التين والتوت والزيتون: لسه بجربهم، الزيتون مبيحتاجش عناية كتير بس لازم تنظيف وقت الإثمار.

أشجار زينة جربتها

الجهنمية: شمس قوية، قليلة المية، وبتحتاج حاجة تتسلق عليها او ممكن تجيب المتقزمة لو مش حابب حاجة طويله .
الثروت لمون: ريحة حلوة وبيطرد الحشرات، بس عايز مية كتير.
التيكوما: وردها جميل، بس بتوقع كتير وبتحتاج تنظيف.
الأكاسيا والبونسيانا: ظل ممتاز، بس بيوقعوا ورقهم، وبيحتاجوا مية في الصيف.

نباتات صغيرة ممكن تبدأ بيها

الريحان: ريحته حلوة، بيحب المية المنتظمة والشمس، وبيحتاج تقليم الزهر عشان يكبر.
النعناع: سهل، بس لازم يتقص دايمًا عشان مايموتش.
الطماطم، الخيار، الفلفل، الباذنجان: شكلهم جميل، بس محتاجين مبيدات ومتابعة.
الفراولة: شكلها حلو، بس حساسة.
الوينكا، الورد، الهيباكسيس، اللانتانا: زهور جميلة، فيهم اللي بيستحمل وفيهم اللي محتاج تقليم.
الألوفيرا: صبار سهل، بيتكاثر لوحده، ومفيد.

نباتات ريحة أو ظل

الفل – العطر – الياسمين: ريحتهم قوية، بس مش بيستحملوا، والياسمين محتاج حاجة يتسلق عليها.
الشيليفرا – الدراسينا – الكنا: بيحبوا الضل، والمية معتدلة، وشكلهم رايق، وفيهم اللي بيدي زهور.

نصايح من تجربتي 

نظام الري بالتنقيط أحسن من الغمر، بيوفر مية ويريّحك.
بلاش تبدأ بحاجات عمرها قصير زي طماطم شيري أو فلفل إسباني.
اختار نباتات حسب الموسم، صيفي في الصيف وشتوي في الشتاء.
بلاش تشتري أنواع كتير في الأول، هتتلخبط في العناية ومش هتلحق تتعلم.
لو النبتة في أصيص، اتأكد إنها في المكان المناسب، متزودش المية ومتنقلهاش كتير.
ابدأ بحاجة بسيطة، نوع واحد أو اتنين. ومع الوقت هتلاقي نفسك بتتعلم وبتجيب زرع أكتر.